Dalstuva

Utsyn frå Dalstuva mot Tysnessåto
START og PARKERING: Ved Sør-Reksteren gravplass
HØYDESKILNAD: 40 - 336 moh
LENGD og TIDSBRUK: 5,6 km tur/retur, opp mot to timar

Dalstuva (336 moh) er høgste toppen på Reksteren.

Ta til høgre og følg fylkesvegen ca 50 m, og ta så til venstre og inn på skogsvegen. Der stigen tek av frå skogsvegen, har det vore ei kolmile på venstre side av vegen.

Stigen held fram på skiftesvis moderat bratt sti og myr, før terrenget flatar ut og ein ser Dalstuva. Landskapet her inneheld både fureskog og myrar, men sjølve toppen ligg over tregrensa.

På toppen finn ein kasse med bok til å skriva seg inn i, og på ein klarværsdag er det fin utsikt i alle retningar. Ein ser Tysnesøya med Kvinheradsfjella og Folgefonna bak, på sørsida av Langenuen ser ein Stord og i vest Austevoll bak Gjøvågsfjella. I nordvest er utsikta mot Sotra, og i nord ser ein mot Os og Bergen sine sju fjell. På nordaustsida av Bjørnafjorden ser ein Samnanger og Fusa med fjella på Kvamskogen bak.

Gjøvågsvarden

Idrettslaget på tur til Gjøvågsvarden
START og PARKERING: Gjøvågskrysset, parkering langs fylkesvegen
HØYDESKILNAD: 30 - 306 moh
TIDSBRUK: Ca 4 km tur/reetur, omlag 1,5 time

Stigen startar omlag 50 m før krysset Gjøvåg/Kaldafoss. Første delen går på ein veg frå 1800-talet. Rett etter ein gamal bru av steinheller svinger stigen opp mot høgre og klatrar raskt oppover åsen, mot omlag 200 moh og eit godt utsyn mot vest og nord.

Frå åsen flatar stigen noko ut opp mot Gjøvågsvarden.

Herifrå har du godt utsyn mot Sotra og byfjella i Bergen, mot Folgefonna og mot vest over heile Austevoll, som skjermar Reksteren mot Nordsjøen bakenfor.